Háskóli Íslands

Í gær, mánudaginn 20. janúar, birtist grein í hinu virta vísindatímariti Nature Reviews Earth & Environment eftir þau Söndru Ósk Snæbjörnsdóttur, Berg Sigfússon, Chiara Marieni, David Goldberg, Sigurð R. Gíslason og Eric H. Oelkers. Greinin ber heitið Carbon dioxide storage through mineral carbonation og er, að sögn Söndru, yfirlitsgrein yfir möguleika á að binda koltvíoxíð í bergi. „Um leið förum við yfir þau tækifæri og hindranir sem eru til staðar í að nýta þessar aðferðir í baráttunni gegn loftslagsbreytingum.“

Hægt er að lesa greinina hér.

Nature Reviews Earth & Environment er undirtímarit Nature, einu af virtustu vísindatímaritum heims, og því er birting greinarinnar mikill heiður fyrir þau segir Sandra. „Birting greinarinnar hefur m.a. mikla þýðingu fyrir útbreiðslu þeirrar þekkingar og sýnileika þeirrar aðferðar sem við lýsum þar.“

Sigurður R. Gíslason er vísindamaður hjá Jarðvísindastofnun og var m.a. nýlega sæmdur riddarakrossi hinnar íslensku fálkaorðu fyrir framlag sitt til íslenskra jarðvísinda og kolefnisbindingar.

Sandra og Bergur eru fyrrum nemendur Sigurðar og starfa þau bæði hjá nýstofnuðu dótturfyrirtæki Orkuveitunnar, CarbFix, sem gagngert var sett á laggirnar til að auka útbreiðslu aðferðarinnar við að binda koltvíoxið um heim allan. Eric H. Oelkers er auk þess gestaprófessor við Jarðvísindadeild, en hann auk Sigurðar leiða vísindanefnd CarbFix verkefnisins.

Sigurður R. Gíslason (fyrir miðri mynd) heldur léttan fyrirlestur fyrir Carbfix hópinn.

Þú ert að nota: brimir.rhi.hi.is